1.4 : ආදාන, ප්‍රතිදාන සහ ස්ථානීය උපාංග වර්ගීකරණය - 2 කොටස

මාර්ග ගුලාව (Track Ball)

මෙය මුසිකයේ (Mouse) ක්‍රියාකාරිතවයට බොහෝ සෙයින් සමාන කර්සරය (Curser) එහා මෙහා ගෙනයාම සඳහා බෝලයක් සවිකර ඇත.පැරණි උකුල් පරිගණකවල (Laptop) බෙහෙවින් භාවිතා විය. ස්ථානීය උපාංගයකි (Pointing Device).

ආලෝක පෑන (Light Pen)

පෑනක ස්වරූපය ඇති ආලෝක සංවේදී උපකරණයකි. තිරය මත අඳින රූප / සංඛේත පරිගණකයට ආදානය කළ හැකිය. ස්ථානීය උපාංගයකි (Pointing Device).

Joysticks

ආදාන උපාංගයක් වන මෙය පරිගණක ක්‍රීඩා (Computer Gaming) කිරීම වැනි විනෝදාත්මක කටයුතු වලදී භාවිතා කරයි. විවිධ මාදිලියේ Joysticks වෙළඳ පොළෙන් ලබා ගත හැකිවේ. ස්ථානීය උපාංගයකි (Pointing Device).

Touch Pad / Touch Screen

උකුල් පරිගණක (Laptops) වල විශේෂයෙන් මෙම උපාංගය දැකගත හැකිවේ. ලේසර් කිරණ ධාරාවක් (Laser Beam) නිකුත්වන තිරය මත ඇඟිල්ලට එය වැදීමෙන් එය හඳුනා ගනියි. මෙම උපාංගය ස්ථර වශයෙන් පවතින අතර මෙය මත ඇඟිලි තුඩ තබා එහා මෙහා ගෙනයාමෙන් අදාල ස්ථානය පෙන්වන දත්තය / වැඩසටහන ක්‍රියාත්මක වේ. අධෝරක්ත කිරණ තාක්ෂණයෙන් ක්‍රියාත්මක වේ. ස්ථානීය උපාංගයකි (Pointing Device).

Digitizer (Graphic Tablet) 

යම් රූපයක් හෝ යමක් මෙම පැතලි තිරය මත විශේෂිත වූ පෑනෙන් ඇඳීමෙන් එය පරිගණකය තුළට ආදානය කල හැකිවේ. විවිධ නිර්මාණ කාර්යයන්හි දී නිර්මාණ ශිල්පීන් භාවිතා කරයි.

සුපරීක්ෂකය / ස්කෑනරය (Scanner)

දෘඩ පිටපතක (Hard Copy) ඇති ලිඛිත සටහන් (Text) සහ රූප (Images), පරිගණක පද්ධතියට ආදානය කිරීම සඳහා සුපරීක්ෂකය / ස්කෑනරය (Scanner) භාවිතා කරයි. මෙහිදී ලේඛන සහ රූප යන දෙකම රූපමය (Image) ආකාරයෙන් පරිගණක මතකයේ ගබඩා වීම විශේෂත්වයකි. නමුත් යම් සුපරීක්ෂකයක ප්‍රකාශ අක්ෂර කියවීමේ (OCR – Optical Character Recognition) පහසුකම ඇත්නම් Times New Roman, Arial වැනි ඉංග්‍රීසි අක්ෂර භාවිත කර ඇති ලේඛණයක් (Document), රූපමය (Image) ආකාරයෙන් නොව ලේඛණ (Document) ආකාරයෙන්ම පරිගණක මතකයේ ගබඩා වේ. මෙවැනි ආකාරයේ සුපරීක්ෂක යන්ත්‍ර භාවිතයෙන් ලේඛන පහසුවෙන් සංස්කරණය (Edit) කිරීමේ හැකියාව ඇතිය.

ස්ථානීය උපාංග (Pointing Devices)

පරිගණක තිරය මත ප්‍රදර්ශනය වන පික්සල (Pixels) සහ පික්සල කාණ්ඩ වලින් සැදුම්ලත් නිරූපක / අයිකන (Icons) ප්‍රවේශ කරමින් ඒවාට අනුබද්ධිත ක්‍රමලේඛන (Programs) ක්‍රියාත්මක කිරීම ස්ථානීය උපාංග (Pointing Devices) වල ප්‍රධාන කාර්යයයි.

උදා: මූසිකය (Mouse), ස්පර්ශක තිරය (Touch Screen), ස්පර්ශක තලය (Touch Pad), මාර්ග ගුලාව (Track Ball), ජොයිස්ටික් (Joysticks)

ප්‍රතිදාන උපාංග (Output Devices)

පරිගණකය මගින් සකස් කරන ලද තොරතුරු  / සංඥා පිටතට ලබා ගැනීම සඳහා භාවිතා කරනු ලබන උපාංග ප්‍රතිදාන උපාංගයි.. සංදර්ශකය / මොනිටරය (Monitor), ශබ්ද විකාශන යන්ත්‍රය (Speaker) හා මුද්‍රකය (Printer) ප්‍රතිදාන උපාංග සඳහා උදාහරණ වේ.

සංදර්ශකය / මොනිටරය (Display / Monitor)

පරිගණකය තුළ සිදුවන අභ්‍යන්තර ක්‍රියාවලිය අපට දැකබලා ගැනීම සඳහා සංදර්ශකය හෙවත් මොනිටරය භාවිතා කරයි. සංදර්ශක වර්ග දෙකකින් යුක්ත වේ. එනම්,

1. කැතෝඩ කිරණ සංදර්ශකය (CRT – Cathode Ray Tubes) 
2. ද්‍රව ස්ඵටික සංදර්ශකය (LCD – Liquid Crystal Displays)

මීට අමතරව අද වෙළඳ පොළේ ආලෝක විමෝචක තාක්ෂණය (LED – Light Emitting Display ) භාවිතයෙන් නිපද වූ සංදර්ශක ඉතාම ජනප්‍රියයි. මේවායේ වාසි සහ අවාසි හඳුනාගෙන භාවිතා කිරීම සහ මිලදී ගැනීම වැදගත් වේ.

ද්‍රව ස්ඵටික තාක්ෂණය භාව්තා කර නිපද වූ පරිගණක සංදර්ශක තිර කැතෝඩ කිරණ නල භාවිතා කර තැනූ පරිගණක තිර සමග සංසන්දනය කිරීමේ දී පහත වෙනස්කම් දැකිය හැකිවේ. ද්‍රව ස්ඵටික තිර වල පහත ලක්ෂණ ඇත.

1. අඩු ඉඩ ප්‍රමාණයක් ප්‍රමාණවත් වීම (Less Space)
2. ඉතා අඩු විදුලි පරිභෝජනය (Less Power Consumption)
3. තිරයේ සෙලවීම අඩු බව (Lack of Flicker)
4. සාපේක්ෂව මිල අධික බව (Expensive)
5. දර්ශනය වීම සීමිත පරාසයක වීම (Limited Viewing Angle)
6. ප්‍රතිචාර දැක්වීමට අවම කාලයක් ගතවීම (Less response time)

සංදර්ශකයක ගුණාත්මක භාවය තීරණය කරන සාධක

1. තිරයේ ඒකකයක් තුල පිළිබිඹු කල හැකි පික්සල ගණන (විභේදනය - Resolution , Ex : 1024 x 768 )
2. පිළිබිඹු කල හැකි වර්ණ ගණන
3. පිටතට නිකුත් කරන අහිතකර විකිරණ ප්‍රමාණය (Radiation)

ශබ්ද විකාශන යන්ත්‍ර (Speakers)

පරිගණක යන්ත්‍රය මගින් සකස් කළ ශ්‍රව්‍ය ගොණු (Audio Files) වලට සවන්දීම සඳහා මෙන්ම ගීත / චිත්‍රපට (Songs / Films) වැනි දී රසවිඳීම සඳහා ශබ්ද විකාශන යන්ත්‍ර (Speakers) භාවිතා කරයි. වර්තමානයේ ඉතා ඉහළ මිළ ගණන් යටතේ විවිධ මාදිලියේ ශබ්ද විකාශන යන්ත්‍ර දැකිය හැකි අතරම මේවායින් ඉහළ රසාස්වාදයක් ලැබිය හැකිවේ. මෙම උපකරණ ශබ්ද විකාශන සහ හිසේ පැළඳිය හැකි ශ්‍රවණ උපකරණ ලෙස දෙ ආකාරයකින් දැකිය හැකිය. මෙහිදී හිසේ පැළඳිය හැකි ශ්‍රවණ උපකරණය (Head Phones) භාවිතයේදී පැළඳි පුද්ගලයාට පමණක් ශ්‍රවනය කිරීමේ හැකියාව ලැබේ.

මුද්‍රණ යන්ත්‍ර (Printers)

පරිගණකය මගින් සකසන ලද ලේඛනයක් (Document) මුද්‍රණය කිරීම සඳහා මුද්‍රණ යන්ත්‍ර භාවිතා කරයි. පරිගණකය මගින් සැකසූ ඉලෙක්ට්‍රොනික ලේඛනය (Electronic Document), මෘදු පිටපතක් (Soft Copy) ලෙසත් එය මුද්‍රණය කළ පසු දෘඩ පිටපතක් (Hard Copy) ලෙසත් සළකයි. මුද්‍රණ යන්ත්‍ර වර්ග ආකාර දෙකකි. එනම් ඝට්ටනය භාවිතයෙන් මුද්‍රණය කරන සහ ඝට්ටනය භාවිතා නොකර වෙනත් තාක්ෂණ  භාවිතයෙන් මුද්‍රණය කරනු ලබන මුද්‍රණ යන්ත්‍රයි. යොදාගන්නා කාර්යය අනුව භාවිතා කරනු ලබන මුද්‍රණ යන්ත්‍රය තෝරා ගනියි.

1. තිත් න්‍යාස මුද්‍රණ යන්ත්‍රය (ඝටන මුද්‍රණ) - Dot Matrix Printer
2. තීන්ත පිහිරි මුද්‍රණ යන්ත්‍රය (නොඝටන මුද්‍රණ ) – Ink Jet Printer
3. බුබුළු පිහිරි මුද්‍රණ යන්ත්‍රය (නොඝටන මුද්‍රණ ) – Bubble Jet Printer
4. ලේසර් මුද්‍රණ යන්ත්‍රය (නොඝටන මුද්‍රණ ) – Laser Printer

මේවායෙහි විවිධ තාක්ෂණ භාවිතා කරනු ලබන අතර මුද්‍රණය සඳහා තීන්ත සපයන ආකාර ද විවිධ වේ.



මුද්‍රණ යන්ත්‍ර වලින් මුද්‍රිත පිටපත් ලබා ගැනීමේදී සැලකිලිමත් විය යුතු කරුණු

1. දෘඩ පිටපතේ ගුණාත්මක බව
2. පිටපතක් සඳහා දැරිය යුතු වියදම
3. පිටපතක් සඳහා ගතවන කාලය
4. භාවිතයේදී නගන ශබ්දය