ගිණුම්කරණ වැරදි නිවැරදි කිරීම

---

ගිණුම්කරණ වැරදි නිවැරදි කිරීම

හැඳින්වීම

විවිධ හේතු නිසා ව්‍යාපාරවල ගනුදෙනු නිවැරදි ව පොත්වල වාර්තා නොවීමට ඉඩ තිබේ. මූලික පොත්වල ගනුදෙනු සටහන් කිරීම, ලෙජරයට පිටපත් කිරීම, ශේෂ පිරික්සුම සකස් කිරීම යනාදි අවස්ථාවල වැරදි සිදු වුවහොත් යම් කාලච්ඡේදයක් සඳහා එම ව්‍යාපාරයේ ප්‍රතිඵලය මෙන්ම යම් දිනකට ව්‍යාපාරයේ මූල්‍ය තත්ත්වය පිළිබඳ ව සත්‍ය තොරතුරු හෙළිදරව් නොවනු ඇත. එම නිසා ගිණුම්කරණයේ දී වැරදි සිදු වී ඇත්දැයි සොය බලා ඒවා නිවැරදි කිරීමට ක්‍රියාමාර්ග ගත යුතු ය. වැරදි තොරතුරු මත ගන්නා තීරණ ව්‍යාපාරයේ දිගු කාලීන පැවැත්මට බාධාවක් වනු ඇත

ගනුදෙනු නිවැරදි ව සටහන් කිරිමේ අවශ්‍යතාව

ව්‍යාපාරවල ගිණුම්කරණ පද්ධතිය මගින් එම ව්‍යාපාරයේ අනෙකුත් කටයුතු කෙරේ මහඟු  බලපෑමක් සිදු කෙරේ. එ මගින් සැපයෙන තොරතුරු අභ්‍යන්තර පාර්ශ්වයට කළමනාකරණ තීරණ ගැනීමට උපකාර වන අතර, බාහිර පාර්ශ්වයට ද ව්‍යාපාරය පිළිබඳ ව අවබෝධයක් ලබා ගැනීමට ප්‍රයෝජනවත් වනු ඇත. එම නිසා ව්‍යාපාරයේ ගිණුම්කරණ කි්‍රයාවලිය තුළින් නිවැරදි තොරතුරු හෙළිදරව් නොවීමෙන් විවිධ ගැටලුවලට මුහුණ පෑමට සිදු විය හැකි ය. එබැවින් ඕනෑම ව්‍යාපාරයක් සිය ගිණුම් පද්ධතිය තුළ වැරදි ඇති වීම වලක්වා ගැනීමට අවශ්‍ය ක්‍රියාමාර්ග ගැනීම පිළිබඳ සැලකිළිමත් වීම වැදගත් වේ. ගනුදෙනු පොත්වල සටහන් කරන විට විවිධ හේතූන් නිසා විවිධ අවස්ථාවල දී විවිධ ආකාරයේ වැරදි සිදු වීමට ඉඩ තිබේ. නමුත් ගිණුම්කරණ කි්‍රයාවලිය පිළිබඳ ව වරින් වර සොයා බැලීම තුළින් වැරදි හඳුනාගෙන ඒවා නිවැරදි කර ගත හැකි වේ.
ද ව්‍යාපාරයක් සතු ව පවත්නා සම්පත් විවිධ ස්වරූපයෙන් පවතී. ඒවා නිසි ලෙස ව්‍යාපාර කටයුතු සඳහා යොමු කිරීම, පාලනය කිරීම මෙන් ම භාවිත කිරීම පිළිබඳ තීරණ ගැනීම සඳහා පහසුවනු ඇත.
ද යම් කාල පරිච්ඡේදයක් තුළ ව්‍යාපාරයේ මෙහෙයුම් ප්‍රතිඵල, එනම් ලාභාලාභ පිළිබඳ ව දැන ගැනීමටත් හැකියාව ලැබේ.
ද යම් දිනකට ව්‍යාපාරය සතු වත්කම්, වගකීම් සහ අයිතිකරුවන්ගේ හිමිකාරත්වයේ වටිනාකම කොපමණ දැයි දැන ගත හැකි ය.
ද ගිණුම්කරණ තොරතුරු භාවිත කරන විවිධ පාර්ශ්වයන්ගේ විවිධ අවශ්‍යතා සපුරාලීම සඳහා ද ප්‍රයෝජනවත් වේ.
උදා -  ආදායම් බදු දෙපාර්තමේන්තුවට ඉදිරිපත් කිරීම සඳහා
¤ සමාගම් රෙජිස්ට්‍රාර්ට ඉදිරිපත් කිරීම සඳහා
¤ කොටස් හිමියන්ට ඉදිරිපත් කිරීම සඳහා 
මේ අයුරින් ව්‍යාපාරයක් සතු සීමිත සම්පත් උපරිම කාර්යක්ෂමතාවයකින් භාවිත කර ගැනීම සඳහා ගනුදෙනු පොත්වල සටහන් කිරීම ඵලදායක වන්නේ එම ක්‍රිරයාවලිය නිවැරදි ව සිදු වන්නේ නම් පමණයි  නමුත් ගිණුම්කරණයේ දී වැරදි සිදු වීමට ඉඩ කඩ තිබේ. එසේ වන්නේ ගිණුම්කරණ ක්‍රිරයාවලිය තුළ විවිධ හේතූන් නිසා මුළුමනින් ම නිරවද්‍යතාව රඳවා ගැනීමට අපහසු වන හෙයිනි.

ගිණුම්කරණ වැරදි සිදුවීමට බලපාන හේතු

ව්‍යාපාර ආයතනවල එකිනෙකට වෙනස් ආකාරයේ ගනුදෙනු විශාල සංඛ්‍යාවක් දෛනික ව සිදු වේ. එවැනි ගනුදෙනු විශාල සංඛ්‍යාවක් සිදු වන ව්‍යාපාරවල ගනුදෙනු ගිණුම් පොත්වල සටහන් කිරීමේ දී එම කටයුතු මුළුමනින් ම නිවැරදි ව සිදු වන අවස්ථාවිරල ය. පහත සඳහන් හේතු නිසා ගිණුම්කරණ කටයුතුවල දී වැරදි සිදු වීමට ඉඩ තිබේ.

1. ගිණුම්කරණ කටයුතුවල යෙදීමේ දී

නිදසුන -

¤ ගනුදෙනු සටහන් කරන්නාට ගිණුම්කරණ ක්‍රිරයාවලිය පිළිබඳ අවබෝධය නොමැතිකම. (ද්විත්ව සටහන් ක්‍රමය පිළිබඳ ව)
¤ නොසැලකිළිමත් භාවය
¤ අමතක වීම සහ මඟ හැරීම්

2. වංචනික කටයුතු සිදු කිරීමේ අදහසින් සටහන් වෙනස් කිරිම.

ගිණුම්කරණ වැරදි සිදු වන අවස්ථා

• ගිණුම්කරණයේ ආරම්භක අවස්ථාව වන මූලික පොත්වල ගනුදෙනු සටහන් කිරීමේ දී,

නිදසුන් -

¤ රු. 17,000ක ගැනුම් ඉන්වොයිසියක් ගැනුම් ජ නලයේ සටහන් නොවීම.

¤ රු. 4,500ක විදුලිය වියදම් ගෙවීම මුදල් පොතේ සටහන් නොවීම.

• මූලික පොත්වල තැබූ සටහන් ලෙජරයට පිටපත් කිරීමේ දී,

නිදසුන්

¤ ආපසු යැවුම් ජ නලයේ එකතුව රු.6,500 ආපසු යැවුම් ගිණුමට රු.5,600ක් ලෙස පිටපත් කිරීම.

¤ රු. 2,100ක ලිපි ද්‍රව්‍ය මිල දී ගැනීම ලිපි ද්‍රව්‍ය ගිණුමට පිටපත් නොකිරීම.

• ලෙජර ගිණුම් තුලනය කිරීමේ දී 
• තුලනය කරන ලද ගිණුම්වල ශේෂයන් ඇසුරෙන් ශේෂ පිරික්සුම සකස් කිරීමේ දී

ගිණුම්කරණ වැරදි නිවැරදි කිරීම සඳහා භාවිත කළ යුතු වන්නේ පොදු ජ නලය යි. ද්විත්ව සටහන් ක්‍රමය පදනම් කර ගනිමින් පොදු ජ නලයේ සටහන් තබා ඉන් පසු අදාළ ගිණුම්වලට පිටපත් කිරීම අවශ්‍ය වේ.

ගිණුම්කරණ වැරදි හඳුනා ගැනීම

ව්‍යාපාරයක ලෙජර ගිණුම්වල ද්විත්ව සටහන් ක්‍රමය අනුගමනය කරමින් ගනුදෙනු සටහන කරන බැවින්, සකස් කරනු ලබන ශේෂ පිරික්සුමේ හර සහ බැර ශේෂවල එකතුව සමාන විය යුතු ය. ශේෂ පිරික්සුමේ හර සහ බැර ශේෂවල එකතුව සමාන නොවූ විට ගිණුම් තැබීමේ දෝෂ පවතින බව පැහැදිලි ය. නමුත් හර සහ බැර ශේෂවල එකතු සම වුව ද ගිණුම්කරණ දෝෂ තිබීමට පුළුවන. මේ අනුව වැරදි නිවැරදි කිරීම සඳහා පළමුව පහත දැක්වෙන අයුරින් වැරදි හඳුනා ගැනීම අවශ්‍යවනු ඇත.

1. ශේෂ පිරික්සුමේ ඓක්‍යය අතර වෙනසක් ඇති නොකරන වැරදි

මේවා ශේෂ පිරික්සුමක් මගින් හෙළිදරව් නොවන වැරදි ලෙස ද හඳුන්වයි. එනම් මෙම වැරදි තිබුණ ද ශේෂ පිරික්සුමේ හර හා බැර ශේෂයන්ගේ ඓක්‍යය සමාන වන නිසාය.

-ගනුදෙනුව ගිණුම් පොත්වල සම්පූර්ණයෙන් ම සටහන් නොවීම

යම් ගනුදෙනුවක ද්විත්ව සටහන ගිණුම් පොත්වල සටහන් නොවීම නිසා සිදු වන වැරදි මින් අදහස් කෙරේ. මේවා අත්හැරීම් දෝෂ ලෙසද හඳුන්වයි. මෙවැනි වැරදි තිබුණ ද ශේෂ පිරික්සුමේ තුලනය වීමට බාධාවක් නොවේ. මෙවැනි වැරදි නිවැරදි කිරිම සඳහා ගනුදෙනුවට අදාළ ද්විත්ව සටහන යොදාගත යුතු වේ

-ගනුදෙනුවක නියමිත වටිනාකම අඩුවෙන් හෝ වැඩියෙන් ගිණුම් දෙකේ ම සටහන් වීම.

විවිධ හේතු නිසා ගනුදෙනුවේ නියමිත වටිනාකම අඩුවෙන් හෝ වැඩියෙන් ගිණුම්වල සටහන් වීම සිදු විය හැකි ය. මෙසේ ගනුදෙනුවකට අදාළ වටිනාකම ගිණුම් දෙකේ ම සමාන වටිනාකම්වලින් අඩුවෙන් හෝ වැඩියෙන් සටහන් වුවහොත් එය ශේෂ පිරික්සුම තුලනය වීමට බාධාවක් නොවේ.

-එකම ගනුදෙනුව ඇතැම් විට ගිණුම් පොත්වල දෙවරක් සටහන් විය හැකි ය

මෙවැනි වැරදි නිවැරදි කිරිමේ දී අදාළ ගිණුම්වල සටහන් තබා ඇති පැත්තේ නොව විරුද්ධ පැත්තේ ඇතුළත් කිරීමෙන් සටහන් දෙකෙන් එකක් ඉවත්වනු ඇත.

-මූල ධර්ම දෝෂ

පිළිගත් ගිණුම්කරණ මූල ධර්මවලට පටහැනිව ගනුදෙනු ගිණුම් පොත්වල සටහන් කිරිම මගින් ඇති වන දෝෂ මූලධර්ම දෝෂ නම් වේ. එහෙත් ඒවා නියමිත වටිනාකමට අනුව ද්විත්ව සටහන් තැබිම නිසා ශේෂ පිරික්සුම තුලනය වීම කෙරෙහි බලපෑමක් ඇති නො කරයි.

-හිලව් දෝෂ

ඇතැම් අවස්ථාවල දී එක් ලෙජර ගිණුමක වටිනාකම වැරදි අයුරින් සටහන් ව තිබීම තවත් ලෙජර ගිණුමක හෝ ගිණුම් කිහිපයක වටිනාකම වැරදි ලෙස සටහන් වීම තුළින් මඟ හැරීයයි. එම නිසා ශේෂ පිරික්සුමේ හර පැත්තේ එකතුව බැර පැත්තේ එකතුවට සමාන වන හෙයින් මෙවැනි වැරදි සෘජු ව ම ශේෂ පිරික්සුමෙන් අනාවරණය නොවේ

2. ශේෂ පිරික්සුමේ ඓක්‍යය අතර වෙනසක් ඇති කරන ගිණුම්කරණ වැරදි

ගිණුම්කරණ ක්‍රිරයාවලියේ දී සමහර වැරදි සිදු වුවත් ඒවා නිසා ශේෂ පිරික්සුමේ හර සහ බැර තීරුවල ඓක්‍යය අතර වෙනසක් ඇති නොවන බව මේ වන විට ඔබ අවබෝධ කර ගෙන සිටී. නමුත් ගනුදෙනු සටහන් කිරිමේ දී සිදුවන ඇතැම් වැරදි නිසා ශේෂ පිරික්සුමේ ඓක්‍යය අතර වෙනස්කම් දක්නට ලැබේ. එම නිසා මෙම වැරදි ශේෂ පිරික්සුමක් මඟින් හෙළිදරව් වන වැරදි වශයෙන් හඳුනාගනී. 

- ශේෂ පිරික්සුමේ හර සහ බැර තීරු දෙකේ ඓක්‍යය අතර වෙනස සොයා ගැනීම.
- එම වෙනස ඇති වීමට හේතු අවිනිශ්චිත බැවින් එම අඩු වටිනාකම පෙන්නුම් කරන සංඛ්‍යාව ඉදිරියෙන් අවිනිශ්චිත ගිණුම යැයි සඳහන් කොට ශේෂ පිරික්සුම තාවකාලික ව සමාන කිරීම.
- අසමාන වීමට හේතු සොයන්න.
- එසේ සොයා ගත් වැරදි පොදු ජ නලයේ ද්විත්ව සටහන් තැබීම මගින් නිවැරදි කිරීම.

අවිනිශ්චිත ගිණුම

ශේෂ පිරික්සුමේ ඓක්‍යයන් සම නොවු විට ඊට හේතු වු වැරදි සොයා ඒවා නිවැරදි කරනතෙක් ඓක්‍යය අතර වෙනස ඇතුළත් කරන තාවකාලික ගිණුම අවිනිශ්චිත ගිණුම යනුවෙන් හඳුන්වනු ලැබේ. එමෙන් ම ගනුදෙනුවල සත්‍ය තත්ත්වය පිළිබඳ ව නිශ්චිත අවබෝධයක් නොමැති අවස්ථාවක එවැනි ගනුදෙනු සටහන් කිරිමට ද අවිනිශ්චිත ගිණුම යොදා ගනි. මෙම වැරදි නිවැරදි කිරීමෙන් පසුව අවිනිශ්චිත ගිණුම පොත්වලින් ඉවත වේ
ශේෂ පිරික්සුමෙන් හෙළිදරව් වන වැරදි නිවැරදි කිරිම සඳහා යොදා ගන්නා ද්විත්ව සටහනෙන් එක් සටහනක් අවිනිශ්චිත ගිණුමේ ඇතුළත් කෙරෙන බව වටහා ගැනිම වැදගත් වේ.

1. ගනුදෙනුවක ද්විත්ව සටහනෙන් එක් සටහනක් පමණක් ගිණුම් පොත්වල සටහන් කර අනිත් සටහන මඟ හැරි තිබීම.
2. ගනුදෙනුවක ද්විත්ව සටහනෙන් එක් සටහනක් අදාළ ගිණුමේ නිවැරදිව සටහන් කර අනෙක් සටහන සඳහා වැරදි සංඛ්‍යාවක් අදාළ ගිණුමට පිටපත් කර තිබිම.
3. ගනුදෙනුවක ද්විත්ව සටහන අදාළ ගිණුම්වල එකම පැත්තේ සටහන් කර තිබිම. - මෙවැනි වරදක් නිසා අදාළ පැත්තේ සටහන් නොවීම සහ වැරදි පැත්තේ සටහන් වීම හේතුවෙන් වැරදි දෙකක් ම සිදු වී ඇත. එම නිසා වැරදි වටිනාකම මෙන් දෙගුණයකින් ශේෂ පිරික්සුමේ ඓක්‍යය වෙනස් වේ.
4. මූලික පොත්වල හෝ ලෙජර ගිණුම්වල හෝ අයිතමයන් එකතු කිරිමේ දී, තුලනය කිරිමේ දී, ශේෂය ඉදිරි පිටුවට ගෙනයාමේ දී සිදු වන වැරදි
5. ශේෂ පිරික්සුම පිළියෙල කිරිමේ දී සිදු වන වැරදි

ගිණුම්කරණ ක්‍රිරයාවලියේ වැදගත් සන්ධිස්ථානයක් වන ශේෂ පිරික්සුම පිළියෙල කිරිමේ දී ද වැරදි සිදු වීමට ඉඩ තිබේ. එසේ සිදු වන වැරදි කිහිපයක් පළමුව සොයා බලමු.

- අදාළ ගිණුම් ශේෂයන් ශේෂ පිරික්සුමට උපුටා නොගැනීම.
- නියමිත වටිනාකම වෙනුවට වැරදි වටිනාකමක් උපුටා ගැනීම.
- ශේෂයන්, ශේෂ පිරික්සුමේ වැරදි පැත්තෙහි සටහන් කිරීම.

මෙවැනි වැරදි පිළිබඳ ව ඔබ විශේෂ අවධානයක් යොමු කිරිම අවශ්‍ය වේ. මෙම වැරදි නිසා බලපෑමක් ඇති වන ස්ථානය කෙරේ විමසිලිමත් වන්න. මෙහි දී සිදු ව ඇත්තේ ශේෂ පිරික්සුමට උපුටා ගැනීමේ දි වරදක් සිදු වීම පමණක් බව සිහිපත් කර ගන්න. ගිණුම්වල කිසිදු වරදක් සිදු ව නැත. එම නිසා මෙවැනි වැරදි නිවැරදි කිරිමේ දී ගිණුම්වල සටහන් තැබීම අවශ්‍ය නොවන බව සිතන්න. මෙවැනි වැරදි නිසා ශේෂ පිරික්සුමේ ඓක්‍ය අතර වෙනසක් ඇති වේ. එම වෙනස වෙනුවෙන් අවිනිශ්චිත ගිණුමක් විවෘත කර තිබේ. එසේ නම් වැරදි නිවැරදි කිරිමේ දී සිදු විය යුත්තේ විවෘත කළ අවිනිශ්චිත ගිණුම ඉවත් කිරීම පමණක් බවයි
ශේෂ පිරික්සුමට පිටපත් කිරිමේ දී සිදුවන වැරදි නිවැරදි කිරිම සඳහා අවිනිශ්චිත ගිණුමේ පමණක් සටහන් තබනු ලැබේ.